மருத்துவம் கடவுள் - 1986

1986. பல முக்கியமான தொழில் காண்ட்ராக்ட்கள் எடுத்து மிகவும் பிசியான வருடம். முதல்முதல் கார் வாங்கின சமயம். அவன் அதுவரை கார் ஸ்டியரிங்கைக்கூட பிடித்ததில்லை. ஒரு பழைய நல்ல காரை வாங்கி வீட்டிற்கு கொண்டுவந்தார்கள். அதை வீட்டைச் சுற்றியுள்ள ரோட்டில் ஒரு ரௌண்ட் ஓட்டிச் சென்றான். ஸ்டியரிங்க் கண்ட்ரோல் வந்தேவிட்டது. மறுநாள் வெளியூருக்குச் செல்லவேண்டியிருந்ததால் காரையே எடுத்துச் சென்றான். ஸ்லோவாக செல்லவேண்டியபொழுதெல்லாம் எஞ்சின் நின்று கடுப்பேற்றியது. பின்னர் ஒரு ஊட்டி சுற்றுலா, அதன்பின் ஒரு சென்னை பயணம், இப்படியாக நன்றாக காரோட்டிட படித்துவிட்டான்.
அந்தப் பழைய காதலியை எந்த சந்தர்ப்பங்களிலும் சந்தித்துவிடக்கூடாது என்பதை மிகத்தெளிவாகவே  முடிவு செய்து வைத்துக்கொண்டிருந்தான். ஆனாலும் விதி அவளை மறுபடியும் ஒருமுறை சந்திக்க வைத்துவிட்டது. அத்தைபெண்ணின் சடங்குவீடு. பொதுவாக இப்படியான விழாக்களுக்கு அவன் செல்வதில்லை. அவனின் தம்பி செல்லமுடியாமல் போனதால் மாமன் மகன் முறைக்கு அவன் செல்லவேண்டியதாகிவிட்டது. மேலும் திருமணம் முடிந்துவிட்டபின் இப்படி விழாக்களுக்கும் கட்டாயம் செல்லவேண்டுமாம். என்ன வழக்கங்களோ, மண்ணாங்கட்டியோ. வீட்டினுள் நுழைந்ததும் அவளின் முகத்தையே காணும்படி ஆகிவிட்டது. அங்கு அவளும் வந்திருந்தாள். அவள் இன்னொரு அத்தைமகள். அந்த நாள் முழுவதும் அவன்முன்னாலேயே குறுக்குமருக்காக நடந்துகொண்டிருந்தாள். ஒவ்வொரு முறையும் அவளின் முகத்தை அவன் நோக்கி, மலர்ச்சியாக காட்டிக்கொண்டேயிருந்தாள். சந்தோஷமாகவும் இருந்தாள். ஒரு சமயம் அவளைப் பார்க்கையில் பரிதாபமே மேலோங்கியது. கைக்குள் இருந்தத் திருமணத்தினை கெடுத்துக் குட்டிச் சுவராக்கியவள். அவளைப் பார்க்கும் ஒவ்வொரு சமயம் கோபமாகவும் இருந்தது.
மாமன் மகன் முறையில் சடங்குப்பெண்ணின் அருகில் அவன் அமரவேண்டியதாகியது. எதிரில் அவள் அமர்ந்திருந்தாள். அந்த நேரம்தான் அது நடந்தது. அதாவது அவளுக்கு மிகவும் பிடித்த "காஞ்சிப்பட்டுத்தி கஸ்தூரி பொட்டுவைத்து" என்ற பாடல் ஒலித்தது. அந்தப்பாடலுக்கு ஒரு அழகிய பின்னினைவும் உண்டு. அது பளிச்சென்று அவனின் கண்முன்னே தோன்றி மறைந்தது.
(அதாவது அவனின் தங்கையின் திருமணத்தின்பொழுது அவள், அவளின் இளவயது அத்தை ஒருத்தியுடன் நின்றுகொண்டிருந்தாள். அப்பொழுது அவன், அங்கு பாடல்கள் ஸ்பீக்கரில் போட்டுக்கொண்டு இருந்தவனிடம், "வயசுப்பொன்னு" இருக்கா என்றான். வயசுப்பொன்னு படத்தில்தான் அந்த "காஞ்சிப்பட்டுத்தி" பாடல் வரும். அதைக்கேட்ட அவள் நக்கலாக, இருக்கு, உனக்கெதுக்கு வயசுப்பொன்னு, அதான் நானிருக்கேன்ல என்றாள். அந்தநேரம் அவளை அப்படியே முத்தமிடத் தோன்றியது, ஆனால் செய்யவில்லை.)
அவளுக்கும் அந்தப்பாடலைக் கேட்டதும், பழைய சம்பவத்தினை நினைத்திருப்பாள் போலும். முதலில் சந்தோஷமாக காட்டிய முகத்தினைக் குனிந்துகொண்டு மறைத்திட முயன்றாள்.  பின்னர் அவளின் நினைவுகள் ஒருமாதத்திற்கு அவனின் மனதிற்குள் ஒடிக்கொண்டிருந்தது.
பின் முழுவதுமாய் தொழிலின் அழுத்தத்திற்குள் அமுங்கி மறைந்தான். அவனின் தாய் அவனுக்கு குழந்தை பிறக்க தாமதித்ததால் என்தெந்த டாக்டர்களை பார்க்கலாம் என்பது பற்றியும், எந்தெந்த கோவில்கள் பலம் வாய்ந்தவைகள் என்கிற ஆராய்ச்சியில் தீவிரமாக இறங்கியிருந்தார்கள். அடுத்த மூன்றுமாதங்கள் புதுப்புது டாக்டர்களின் சந்திப்புகளிலுமாக, கிட்டத்தட்ட தமிழகத்தின் முக்கிய கோவில்கள் அனைத்துக்கும் சென்றாகிவிட்டது. எதைப்பற்றியும் கவலைகொள்ளாத அவன் மனம் கவலை கொள்ளத்துவங்கியது. வருடம் 1986 முடிந்தது.